Өмірге бір адамдай ғашық жанмын,

Өмірге бір адамдай ғашық жанмын,
Жасырмай жан сырымды ашып салдым.
Білгенге баға жетпес асыл сөздің,
Аңдамай мен әңгүдік басын жардым.

Тынбастан тырбаң-тырбаң тірлік еткен,
Пендемін тырбаңдаумен бір күні өткен.
Ақын деп мақтай-мақтай бұлбұл еткен,
Халқыма алғыс айтам шын жүректен.

Шым-шымдап өн бойымда шымыр бұлақ,
Тұрамын тіршілікте жырым құрап.
Суындай шымыр бұлақ шым-шым аққан,
Таусылар емес бойда сырым бірақ.

Жалғанды жалпағынан басып жүрмін,
Өзімше жырдан шашу шашып жүрмін.
Түбіне жеткен бар ма бұл тірліктің?
Осыған жауап таппай сасып жүрмін.