Біз бар болсақ

Мен бармын ба, сен барсың ба-халқым бар,
Халқым барда қасиетті салтым бар.
«Халқы бардың қамы болмас» деген шын,
Халқым барда құдірет, күшім, даңқым бар.

Мен бармын ба, сен барсың ба-Отан бар,
Отан барда қандай қайғы қапам бар.
Отан үшін отқа түсер ботаң бар,
Отансызды опасыз деп атаңдар.

Мен бармын ба, сен барсың ба-тілім бар,
Тілім барда тінім бүтін, дінім бар.
Тілсіз халық тірі қалмас ұғыңдар,
Ана тілді аман сақтап тұрыңдар.

Мен бармын ба, сен барсың ба-Күн де бар,
Біз бар болсақ Отан, Халық, тіл де бар.
Мың ажалдан тілін сақтап, тірі өткен,
Мұндай Отан, мұндай халық кімде бар?!