Өтіп жатыр күздің соңғы күндері

Жапырақтар төгіліпті бақтағы,
Атырапта жаздың ыстық жоқ табы.
Қарашаның жауды алғашқы ақ қары,
Көп ұзамай қыс қағады-ау қақпаны.

Алай-дүлей ауа райы алмасты,
Ызғар күндер бір-біріне жалғасты.
Қарашаның қары жауды алғашқы,
Қара шашты түп-түгелдей қар басты.

Аспан асты аппақ-аппақ көбелек,
Қонып жатыр жерге келіп себелеп.
Арт жағы аяз-ау деп керемет,
Көңіл шіркін құлазыды не керек.

Алғашқы қар кенет бірден еріді,
Соны көріп пейілім де кеңіді.
Сәл-ақ сәтте өзгеретін құбылып,
Пай-пай шіркін адамзаттың көңілі.

Өтіп жатыр күздің соңғы күндері,
Ойға алмайды дейсің сонда кім нені!
Тіршілікпен жүргеніңде алаңдап,
Өте шығар дүниенің дүрмегі.